好多人都會話柬埔寨好亂好污糟，唔同嘅意見令我出發去呢個trip之前已經有一個唔好嘅既定印象。一落機去到酒店settle好之後，就去咗s21博物館。呢個博物館對我嚟講真係好深刻、好深刻。直至到而家我仍然覺得好震撼，完全冇諗過人性可以咁醜陋，人嘅生命原來可以咁渺小。但係之後聽返Emily同Samantha 講，其實特登帶我哋去呢達地方就係為咗令我哋了解當地嘅歷史 ，然後唔好再令呢件咁殘酷嘅事件重蹈覆轍。柬埔寨呢個地方之前其實有好多好勁嘅人，但係就係因為之前嘅歷史，令到佢哋冇辦法置身喺呢個地方，甚至被人殘害。

提到讀書勁，令我即刻回想到去學校服侍嘅兩日。喺呢短短嘅日子我真心感到好滿足同埋開心，喺學校嘅小朋友身上我學到唔係所有嘢都係必然。就好似學習嘅機會，從小朋友同埋家訪裏面訪問嘅家長口中可以聽到其實佢哋好難得先有一個機會喺金邊呢個城市裏面讀書，有好多都係因為金錢或者家庭嘅問題，所以讓我反思到要好好珍惜而家所擁有嘅嘢。

呢兩日學校服侍裏面，我亦領會到另一樣嘢，由於我擔任住組長呢個角色，所以都有唔少嘅壓力 要喺小朋友面前用英文教書對我嚟講唔容易，但係好感恩最後都成功突破到自己，教書嘅過程中我哋組員之間都會互相幫助對方，令我感受到自己並不孤單，就好似喺信仰呢條路上面，往往都會有好多人陪伴住你，包括弟兄姊妹。

呢個trip完咗之後我諗會咗好多嘢，喺信仰上面都反思咗唔少，希望我所感受到嘅，可以繼續記住喺心裏面，唔好被繁忙嘅日常沖淡。